دوشة على الفاضى

يشغل بالى منذ فترة كبيرة العلاقات بين الاشخاص واعلان ذلك على الملاء فى كل وسائل التواصل أو حتى هنا فى منتدانا حتى لو بلغه الاشارة مثل مابيقولوا
في رأيي إن العلاقات اللي ما فيهاش كلام حُب كتير و دوشة ع الفاضي والمليان ،واللي مش بيعلنوا ده كل شوية على استوريز والميديا ، أقصد الناس الهادية اللي حُبهم مستخبي بينهم وبس، دي العلاقات اللي بتدوم وحقيقية جداً على فكرة سواء اتنين مُحبين أو أصحاب ....المُستمتع في تجربة حُب واللي مرتاح مع شخص بيحبه ،مش محتاج كل شوية يثبت للجميع إنه عاشق ولهان ،وانه عايش love story تجنن ...مش محتاج يظهر ده ولا يعلن عنه....ساعات العلاقات الكاملة التامة الدافية أصحابها بيخافوا يتشاف محبتهم لبعض ليتحسدوا ....بيخافوا على حبهم لبعض وكأنه " بيبي" أو " زهرة جميلة " ..بيراعوها بماء العين والقلب ....محاوطين بدراعتهم وروحهم حوالين " الحُب" ده لأبعد مدى ...خوفاً حتى من إنه يتلاحظ ..وكلمة يتلاحظ هنا المقصود بيها إنه "يتحسد " أو يتشاف من حد بيتمنى يعيش لحظة واحدة من السعادة دي ..
وعلى فكرة بقا أصحاب الحُب المستخبي الدافئ ده بيكون قلبهم شبعان جداً، شبعان اهتمام صادق ،وسرّهم مع بعض ...محدش له القُدرة إنه يدخل بينهم أو حتى يحاول يتطرق لحياتهم ....عاملين خط أحمر لأي مُعتدي أو مُتفرّج ..
و ده الحُب اللي بيعيش بالسنين ومع العُمر بيكبر ويزيد ويعمّر القلب والروح ....بيخللي صاحبه مُكتفي .. أقل حاجة من المحبوب بتكفيه ...ولو نظرة عين حتى ....
الحُب مش عايز شوشرة ...الحُب محتاج ناس تفهم وتقدّر وتقدّس العلاقة ... هذا رآى
وأنتم ماهو رآيكم ....؟
/
\
دعوه للنقاش ​